ا. ث. العمر ٣٨ منطقة الشمال معسكر جباليا
 
 
الأوضاع اللي بالشمال قد ما أوصفلك وقد ما أحكيلك
 
 
مش زي ما البني ادم (الانسان) يعيشها
 
 
يعني شح مواد غذائية شح أغدية للأطفال والمي النضيفة والمي المفلترة
 
يعني بكل معنى الكلمة تحمل كلمة مجاعة
 
 
ما في ولا وجبة ناكلها في اليوم لأكون انا صحيح في جوابي ما في نهائي ولا وجبة
 
 
بناتي لما بيصحوا الصبح يعني لا اخفي عليكي
 
بنجيب بكيت الشوكو اللي كان بشيكل صار بثلاث شيكل
 
 
 
بجيبوا وبغليه بمي وبشربه للبنات طبعاً بدون سكر
 
 
لانه ما في سكر في القطاع عنا بالشمال ولما كان متوفر كان بقيمة 25  شيكل وما بنقدر نشتريه بالسعر هاد
 
 
 
خلال النهار البنات لما يجوعوا ما في أي نوع غذاء تروحي تشتريه للبنات وتاكليهم
 
قضامة، فستق، وهكذا، لما يكون عسل موجود معلقة عسل للبنات علشان ما يهبفتوش او السكر عندهم ينقص
 
 
انا عندي صار اثنين مصابين بالتهاب الكبد الوبائي عندي البنت والولد صاروا مصابين فيه
 
البنت حالياً لحد الآن ماشي فيها، نادين عمرها 13 سنة ولحد الان ماشي فيها وخالد الحمدلله صار احسن من اول عمره ٢٠
 
يعني احنا بحكيلك الله هيك مطلعلهم، بنتي بكون موجود في عسل وسعره غالي جداً بجيبلها عسل معلقتين ثلاثة بالنهار بالكتير
 
 
ما في أي نوع تاني سكريات وانتي عارفة الكبد هو بينشط بالكسريات وما في مش موجود
 
 
 
وهزلانين وتعبانين ودايماً البنت نايمة مواصلة الليل بالنهار نوم
 
يعني سامعة صوت بنتي والله بتصيح انها جعانة ماريا عمرها اربع سنوات شو رأيك؟
 
 
ما في اشي اطعميها ما في أي شيء اطعميها إياه
 
 
وحياة الله ما بكذب عليكي يعني الحال طيب بدها بيضة طيب اخر مرة اكلت بيضة في شهر 11
 
 
بنتي كانت متعودة على الحليب طيب ما في حليب! شو أعمل؟
 
ما في خضروات لانه الموجود الناس اللي زارعة جزر في الأراضي اللي حواليها الكيلو بعشرة شيكل والجزر لا يكفي
 
 
 
عندك البصل كان موجود امبارح الكيلو ب 35  شيكل بصراحة ما عنا قدرة نشتريه!
 
 
وحتى لو عنا قدرة نشتريه البصل شو بدنا نعمل عليه!
 
 
ما في أي أنواع بقوليات لا رز ولا سكر ولا طحين يعني اساسيات الحياة مش موجودة
 
 
 
الشمال يفتقر جداً للأشياء هاي واذا بتسمعوا في قصة مساعدات انها فاتت للشمال صدقاً ما رأينا ولا شيء
 
 
واحنا بدنا برج من الجوع مش قادرين نقف ع أجرينا
 
ما في شيء تشتريه!
 
طبعاً الطحين ما تسألي عن شيء اسمه طيحن نلانه احنا نسينها لهاي الكلمة نسينا حتى لونه
 
 
قصة الشعير والذرة واكل الحمام واكل الأرانب يعني اللي الناس كانت تطحنه وتاكله
 
انا بناتي ما قدروله ما استساغوه يعني احنا جبنا شعير مرة
 
 
وما عرفت اعجن وما عرفت اسويه وبعدين مقطوع هلقيت ما في
 
 
ياريت يكون موجود يعني يسد الجوع! ما في مش موجود والكيلو بيوصل ل 20 و ل 25
 
 
حلم الجوعان عيش مش هيك بيحكوها!
 
 
انقلب الحال في لحظة اه والله يعني اهم شيء يفوت يعني اكل وشرب
 
أولادي كل واحد ورا الثاني قاعدين بيمرضوا ينزلوا!
 
 
التهاب الكبد الوبائي انا بنتي لو تشوفي لون عينيها بحكولك صفار لاء مش صفار
 
 
 
بنتي لون عينيها على خضار لون البياض صار على خضار من شدة الشيء
 
لون بولها يعني احكيلك ما اوصفه سوري على هالكلمة زي كأنك حاطة عليه كركم من شدة الصفار اللي في جسمها
 
 
 
 
تعبانين والله الأوزان نزلت جداً جداً جداً اجانا رجيم من الله بس هادا مش رجيم هادا جوع
 
 
يعني انا قاعدة أسبوعين والثالث هيفوت رمضان كيف بدنا نصوم احنا
 
بدي اكل يا ماما سامعة بدي اكل يا ماما!
 
 
شو ذنبنا احنا في اللي بصير؟
 
انا بسمع في حالات بمدارس الايواء بسمع انو الأم ولدت ما في حليب لانها ما بتاكل ما بدر الحليب فما في حليب فالطفل بيموت
 
 
انا ابن جيراني جنبنا يعني بيني وبينه حيط الولد بنام وبصحى وهو بصرخ من الجوع عمره اربع شهور
 
 
بصرخ صراخ لدرجة انو بتعب من كتر ما بصرخ بنام وهو تعبان الود
 
 
وهي الأم تسكت فيه وانا بسمع صوت صياحها بسمع صوت صياح الأم
 
اللي سمعته انو كانت الناس تنشف الأكل للحمام على السطوح فبجيبوا ببلوه بمياه لولادهم وبطعموهم إياه
 

صدقاً قد ما احكي مش زي البني ادم يعيش الاشي ما في غير معونة رب العالمين

انا مش كاسر ضهري غير بناتي يعني شو بدي اطعميها
 
 
يعني لو في حليب يعني قد ما كان سعره بشتريه بس ما في انك تشتري
 
الحمدلله على كل حال، كل حياتنا بقدر، ان شاء الله الله كريم