اسمي الاء محمد عمر شقه

عمري 28 سنة

أولادي 3 استشهدوا مع زوجي

مع دار عمي

بعد المغرب مباشرة صار القصف ع البيت

برميل كامل يعني العمارة كلها صارت جورة

ما صار أي معالم للعمارة كلها

دمار هائل

كان في البيت 18 شخص

واستشهدوا جميعاً

كنت طالعة أنا وحبيبة

عمرها حالياً 3 سنوات

كنت طالعة أنا واياها

أمي كانت تعبانة

هي بتتعب كل فترة والتانية يعني

بنضطر ناخدها ع المستشفى

حتى حبيبة أنا ما كنت بدي اخدها

كنت بدي أخليها عند دار عمي

اضطريت اخدها لأنها صارت تعيط

بدي ماما

أخدتها وطلعنا ع دار أهلي

ساعتها صار القصف بنفس اليوم

اتلقيت الخبر من أخوي

إجى حكالي في بيت لدار الجزار

قصفوه بشكل كامل

حكيتله لالا أكيد مش إحنا يعني

وهيك

وصرت أرن على زوجي

وعلى عمي

وعلى أخوات زوجي يعني

بالدار

ما اتلقيت أي.. ما في كله مغلق

بعدها توترت

ما نزلوا الاسم

بعدها بشوي إلا هم نزلوا دار أبو عاصف الجزار

صرت مش قادرة أتمالك أعصابي

مش عارفه شو أعمل

كان الوقت بعد المغرب

أي سيارة بتطلع

بخبطوها الجيش

كزا عيلة استشهدوا في رفح

وصارت مجازر

يعني ما كنت قادرة إنو أطلع

اضطريت إنو استنى للصبح

كنت خايفة كتير ع أولادي

وزوجي

ودار عمي

أخوي أجى حكالي

اتطمني يختي

هاي نزلوا فيديو لبنت كأنها بنتك

اتطلعت ع الفيديو

والله العظيم

أقسم بالله كأنها بنتي

كأنها بنتي

نفس طولها

نفس جسمها

نفس ملامحها

نفس شعرها

ماسكه هيك برقبة المسعف

ماسكة برقبة المسعف

يعني صرت أقول الحمدلله

هاد أنا رح أروح ع المستشفى

رح ألاقيها ع السرير

كتيرها إصابة

جرح

غرز

رح أروح فيها

بنتفاجئ لما طلع النهار

رحت ع المستشفى

أول وحده أشوفها في الكفن

أتطلع ع الكفن

مكتوب اسم غنى الجزار

بحكيلهم اسم غنى هاد

اسم غنى؟

لأ أنا شفتها عايشة

شفتها عايشة

أمانه تشيلوا عن وجهها أنا بدي أشوفها

اتأكدت إنها غنى

غنى عمرها 7 سنوات

بس الإصابة كانت في رأسها

يعني كلها من ورا رايحة

بعدها يعني صرت أقول

طيب وين الباقيين؟

وين الباقيين؟

وين نغم؟

وين أسامة؟

بحكولي لسا ما طلعوهم

رحت ع البيت

مكان بيتي

لقيته دمار دمار دمار

ولا اشي مكانه

ولا اشي ما تشوف جورة كبيرة

وخلص

مش قادرين

وقفت وينكوا يا ماما ؟

يعني إجى الدفاع المدني

وإجوا المسعفين

لكن مش قادرين يطولوا أي شيء

بنتي الكبيرة ثالث يوم لما قدرنا نطولها

وما قدرت أشوفها

ما قدرت

أخذوها على الدفن مباشرة

ابني برضه تاني يوم لما طلعوه ما شفته

زوجي كان أشلاء

كمان ما شفته

حسيت يعني أنا بحلم ولا بعلم؟

شو هاد يلي بصير؟

مش قادرة إني استوعب

لما شفت غنى .. حسيت كأنه إجريه وقفوا

سلفي هو الوحيد هو يلي ضلو طيب

ما ضل أي حدا تاني

طلعوا

ابنوا الصغير لقيوه مدفون بالرمل

ما لاقوا فيه أي إصابة

مخنوق خنق

مخنوق خنق من الرمل

حتى أولاده على مدار الأسبوع كلهم

أخته اسمها الآء

طلعوها بعد أسبوع

هو يلي ضلوا

هو يلي ضلوا لحاله

صعبة صعبة صعبة

فوق ما تتخيل صعبة

لأنو فقدان أولادي

كان من أبعد تخيلاتي

إني أفقد أولادي

كان صعب كتير عليّ

لأنو بتذكرهم بكل اشي

كنا بنحكي أنا وبنتي نغم

كانت شاطرة كتير في الرياضيات

كانت شاطرة

أقسم بالله معلمة الرياضيات

تحكيلي عبقرية

كانت تحكيلي بدي أصير مدرسة رياضيات

أسامة ابني كان دائماً يحكيلي

بدو يصير ضابط في الشرطة

وبنتي غنى كانت ناعمة

كنت دائماً أحكيلها إنت بسكوتة

بس ضلك واقفة على المراي ومشطي

بتحس اشي في القلب هيك انطفى

اشي في القلب

خلص راح

يعني كل يلي كنت أبنيله

وأحلم فيه

ومستعده لإلو

كله راح

هيك بلحظة بتحس الحياة كلها وقفت

وقفت

ما ضل اشي حلو إنك تنبسط لإلو

ما ضل اشي حلو تستناه

ضلت صورهم

ضلت صورهم .. بس

التجربة صعبة كتير

يعني يلي شفته مش سهل

مش سهل جداً إني أشوف مخ بنتي طالع قدامي

أنا خفت إني أقربلها

أنا قاعدة ومش عارفه كيف ابدأ؟

كيف ابدأ ؟ شو أعمل؟

أنا حياتي كلها وقفت

كيف ابدأ تاني؟

شو أعمل بحياتي؟

طيب كيف أكمل؟

طيب كيف أطلع من يلي أنا فيه ؟

بنتي يعني كمان

صرت مش قادرة إني أعطي كفاية

يعني زي ما بتحكي طاقتي خلصت

نهائياً خلصت

مش قادرة أعمل ولا اشي

حتى الأكل مش قادرة أذوق طعمه

لما أجوع أجوع آكل بس هيك تصبيرة

ما في إلي نفس في الحياة نهائياً

خصوصاً يعني بنتي الصغيرة هذه لما تفقد إخواتها

أنا بصبر فيها بالكلام

وقلبي من جوى قاعد بتمزع

بتقطع

بنحرق

مش عارفه شو أعمل ؟

أصبر بنتي وإلا أصبر حالي

وإلا شو أعمل ؟

خايفه على حبيبة كتير

خايفة على مستقبلها

وخايفة على حياتها

من جميع النواحي

يعني نفس أأمنلها كل اشي

خصوصاً البنت يعني صغيرة

بتطلب وبتطلع

نفسي أأمن مستقبل البنت من جميع النواحي

يعني حاسه يمكن هي المصبرتني بعد رب العالمين

إنو أضل أوقف مرة ثانية

يعني أكثر حدا بفكر فيه

هو حبيبة

أعوضها عن كل شيء

أكون لإلها أمها وأبوها واخواتها

وكل اشي إلها